شێعری هه‌ڵبژارده‌
شێعری وه‌رگێڕدراو

شیعر

نزا

6 May 2009
ناسری حیسامی

ئه‌وی ساڕێژ بوو برینی به‌ ده‌وا و مه‌رهه‌می تۆ
ئێسته‌ بڕوانه‌ چلۆن زامی هه‌موو هاته‌وه‌ سۆ

وه‌ره‌ سه‌یری بکه‌ بۆ خۆت که‌ چ وێرانه‌یه‌ باغ!
هێند سته‌مدیده‌یه‌‌ بولبول که‌ ده‌می نایه‌ته‌ گۆ.

به‌ په‌ڕوباڵی وه‌ریو، لووتکه‌ مه‌گه‌ر بێته‌ خه‌وی
ئه‌و هه‌ڵۆی سێبه‌ری باڵی ده‌کشا سه‌ر که‌ژ و کۆ

به‌ شه‌پۆل دێته‌ که‌ناران به‌له‌می چۆڵ و شکاو
گوێت نه‌دا گریه،‌ گه‌لێ پێم وتی تۆفانه‌ مه‌چۆ!

مه‌ل که‌ وا ڕۆیی له‌ باغ، لاله‌ که‌ دێ سینه‌ به‌‌ داغ
ئه‌وه‌ نه‌فرین و نزا و دادی شه‌هیدانه‌ له‌ تۆ!

به‌زمی شاهانه‌ نییه‌، باده‌ و په‌یمانه‌ نییه‌
ئه‌وه‌ خوێناوی دڵه‌، نانی هه‌تیوانه‌، مه‌خۆ!



حه‌یف و بریا به‌سه‌!‌ کۆشکێ که‌ له‌ لم سازی بکه‌ی
تێک ده‌ڕووخێ، که‌ هه‌بێ یا که‌ نه‌بێ عیلله‌ت و هۆ

ده‌می تۆ شیرنه‌ جوانێ! به‌ بڕۆ تاڵی مه‌که‌
که‌ به ‌قه‌ند بگری وڵات، هه‌ق نییه ‌تاڵان‌‌وبڕۆ!

21/06/2008
ستۆکهۆڵم
بگه‌ڕێوه‌|3110 جار خوێندراوه‌ته‌وه‌|3 بۆچوون| بینێره‌| چاپ
ئارۆ | 17 May 2009 - 23:23
سلاو مامۆستای هێژا
مامۆستا گیان ته‌نیا ئه‌توانم بلێم که‌ زمستانی فارسیه‌ نزاکه‌ی تۆ
ئارۆ

وه نه وشه | 15 May 2009 - 05:56
زۆر جوانه شیعره کانتان هه رچه‌ند ئه‌من یه‌که‌م جاره سه‌عاده‌تی وه‌م هه‌بووه بیانخوێنمه‌وه. هه ر بژی شاعیری به‌ڕێز.

sebari darabi | 7 May 2009 - 20:59
سه‌لام کاک ناسری به‌ڕێز و خۆشه‌ویست! ده‌کرێ بزانم ئه‌وه‌ ئی خۆت بوو یان نا؟ داوایه‌کیشم لیت هه‌یه‌، تۆ په‌خشانێکت هه‌بوو به‌ ناوی ئارێز ئارێز، ئه‌گه‌ر ده‌کرێ به‌ ده‌نگ بیخه‌یه‌ سه‌ر سایته‌که‌، چونکه‌ ئارێز ئارێزی تۆ پڕ بوو له‌ ئومێد و هه‌ستی شۆڕشگێڕانه‌، که‌ له‌ بیرمه‌ یه‌که‌م جار وا بزانم له‌ ڕۆژی کۆمه‌ڵه‌ له‌ زڕگوێز له‌ ئوردووگای شوان خوێندته‌وه‌.
هه‌ر سه‌رکه‌وتوو بی.
..................................................................................
خوێنه‌ری به‌ڕێز! ”نزا“ شیعری منه‌. چه‌ند جاری دیکه‌ش، خوێنه‌ران له‌ با‌به‌ت شیعر و نووسراوی دیکه‌ که‌ له‌م ماڵپه‌ڕه‌ بڵاو کراونه‌ته‌وه‌، پرسیاریان لیکردووم که‌ ئایا هی منن. بۆ ئاگاداریی ئێوه‌ و هه‌موو خوێنه‌رانی به‌ڕێزی دیکه‌ی ئه‌م ماڵپه‌ڕه‌، هه‌رچی لێره‌ بڵاو ده‌کرێته‌وه‌، هی‌ منه‌، مه‌گه‌ر ناوی که‌سێکی دیکه‌ی لێ نووسرابێ. بۆ ئه‌وه‌ی خۆ بپارێزم له‌ چه‌ندپاته‌ بوونه‌وه‌ی ناوه‌که‌، ناوی خۆم له‌ بن به‌رهه‌مه‌کان نانووسم. ئه‌گه‌ر به‌رهه‌مێک هی که‌سی دیکه‌ بێ، ناوی ده‌نووسرێ.
ئه‌و به‌رهه‌مه‌ی به‌ ناوی ”ئارێز ئارێز¬“ ناسرا، له‌ ڕاستیدا ناوه‌که‌ی ”په‌یامی پێشمه‌رگه‌ی کۆمه‌ڵه“‌یه‌ و یه‌که‌مجار، ناوه‌ڕاستی نه‌وه‌ده‌کان، له‌ بیرم نییه‌ چ ساڵێک، له‌ زڕگوێز، له‌ مه‌راسمی ڕۆژی پێشمه‌رگه‌ی کۆمه‌ڵه‌دا خوێندرایه‌وه‌. ئه‌م به‌ینانه‌ دیتم له‌ یووتیووب به‌ ده‌نگ بڵاو کراوه‌ته‌وه‌.
له‌م لینکه‌ ده‌توانی گوێی بده‌یه‌ی.
http://www.youtube.com/watch?v=3uKHrw6HeBE&feature=related
هیوادارم به‌ زوویی بتوانم لێره‌ بڵاوی بکه‌مه‌وه‌.
به‌ ڕێزه‌وه‌
ناسری حیسامی

بۆچوون بنێره‌