شێعری هه‌ڵبژارده‌
شێعری وه‌رگێڕدراو

شیعر

چه‌ند کورته‌شیعر

24 Apr 2009
ناسری حیسامی

(1)
له‌ دووره‌ده‌ست
له‌ ئاسۆوه‌
ڕه‌نگی سپی و سووری به‌یان
خه‌ریکه‌ سه‌ر وه‌ده‌ر ده‌نێ.

من نازانم
له‌ بێداریی ئه‌مشه‌وی من دڵگر بووه‌
یان خه‌ریکه‌ پێده‌که‌نێ.


(2)
کامه‌ ڕێگه‌ هه‌ڵبژێرین
زوو به‌ به‌خته‌وه‌ری ده‌گا؟

به‌خته‌وه‌ری زۆر دوور نییه‌،
ئه‌و شته‌یه‌ که‌ هه‌ر ئێستا
دڵنیایی به‌ تۆ ده‌دا.


(3)
ئه‌وه‌ جێ پێی تۆیه‌ له‌ سه‌ر به‌فر
ئه‌وه‌ش چه‌تره‌شکاوه‌که‌ت له‌ قه‌راخ ڕێ.

به‌ ده‌م باوه‌
له‌گه‌ڵ شه‌پۆلی باڕندا
بۆنی گوڵه‌گه‌زیزه‌ دێ.


(4)
هه‌تا دوێنێ
ژانی ڕه‌نگاوڕه‌نگی پاییز
له‌سه‌ر نوێنی به‌رینی خاک ڕاکشابوو.

ئه‌م به‌یانییه‌ کاتێک هه‌ستام
په‌رده‌ی سپی و ساردی به‌فر
به‌ سه‌ر له‌شیدا درابوو،

له‌و ئارامییه‌ به‌رینه‌دا
هه‌ڵپه‌ی هه‌موو ڕه‌نگی جیهان
له‌ یه‌کسانیی سپێتیدا،
قاڵ کرابوو.

.
بگه‌ڕێوه‌|3511 جار خوێندراوه‌ته‌وه‌|1 بۆچوون| بینێره‌| چاپ
nawzad | 6 Jul 2009 - 19:48
سپاس. سه‌رکه‌وتوو بیت.

بۆچوون بنێره‌