شێعر
شێعری وه‌رگێڕدراو
ده‌نگ‌ودیمه‌ن
گفتوگۆ
وێنه‌ی ئه‌مجاره‌‌
avatar


وەفایی چت لە مەیخانان، کە تۆ وا پیر و ئیفتادەی؟

9 Nov 2011

وەفایی






بە نازێکی کوشنده‌ی سه‌دهه‌زار جان‌ودڵ‌ئوفتاده‌ی
مه‌له‌ک یا حووری عینی تۆ، فریشته‌ی یا په‌ریزاده‌ی؟

به‌دڵ خه‌ندێکی بنوێنه‌، بلوورین‌ساعیدت بێنه‌!
یه‌دی به‌یزات هه‌یه‌ تۆ ده‌م له‌ ئیعجازی مه‌سیحا ده‌ی!

نه‌ قه‌ند تامی ده‌بێ قوربان، نه‌ گوڵ ڕه‌نگ و، نه‌ عه‌نبه‌ر بۆ
ئه‌گه‌ر جارێک به‌ خه‌نده‌ بێی سه‌ری زولفت به‌ ده‌م با ده‌ی!

کوتت: ”ها زولف!“ و کافر بووم، کوتت: ”ها ڕووم!“ و چاتر بووم
که‌ من هه‌ر بێمه‌ سه‌ر ڕێی تۆ، ده‌بێ تۆ بۆچ له‌ من لاده‌ی!

ده‌مت وا بێنه‌، ده‌ستم بگره‌ با بمرم له‌به‌ر چاوت
به‌ جامێکی خه‌ڵاسم که‌ له‌ده‌ست ئه‌و تورکه‌ جه‌للاده‌ی!

به‌ چاوی مه‌ستی تۆ که‌وتووم، به‌ تاری زولفی تۆ شه‌یدام
نه‌خۆشی تۆم ده‌ناڵێنم، حه‌یاتم بۆچ سه‌رم ناده‌ی!

که‌ تۆ سوڵتانی ڕوحمت بێ، به‌ زولفان به‌س دڵم تێکده‌!
ده‌بێ تا که‌نگێ به‌یتوڵلا به‌ده‌ست کافر به‌ یه‌غما ده‌ی!

ده‌مت بێنه‌ به‌دڵ بگرم، له‌به‌ر جامی له‌بت بمرم
ده‌ماده‌م ڕووح‌به‌خشی تۆ، له‌باله‌ب ساغیر و باده‌ی!

چرای قه‌ندیله‌، شه‌مسی ئاسمانه‌ ڕووی دره‌خشانت
ئه‌گه‌ر سه‌د جار به‌ زوهره‌ و موشته‌ری ڕووبه‌ندی پێداده‌ی!

وه‌کوو ماسی و سه‌مه‌نده‌ر تشنه‌گیم ناچێ ئه‌گه‌ر سه‌دجار
با ئاب‌وڕه‌نگی ڕووت سینه‌م وه‌به‌ر تیری ته‌جه‌للا ده‌ی!

له‌به‌ر چاوی وه‌کوو زولفی په‌رێشان که‌وتم و فه‌رمووی:
”وه‌فایی چت له‌ مه‌یخانان، که‌ تۆ وا پیرو ئیفتاده‌ی!“

١) نه‌ قه‌ند تامی ده‌بێ قوربان، نه‌ گوڵ ڕه‌نگ و، نه‌ عه‌نبه‌ر بۆ
لە دیوانەکەی چاپی کۆڕی زانیاریدا ئاوا نووسراوە:
نه‌ قه‌ند تامی ده‌بێ قوربان، نه‌ گوڵ ڕێز و، نه‌ عه‌نبه‌ر بۆ

٢) به‌ چاوی مه‌ستی تۆ که‌وتووم، به‌ تاری زولفی تۆ شه‌یدام
لە دیوانەکەی چاپی کۆڕی زانیاریدا ئاوا نووسراوە:
به‌ چاوی مه‌ستی تۆ که‌وتووم، به‌ ناری زولفی تۆ شه‌یدام

٣) نه‌خۆشی تۆم ده‌ناڵێنم، حه‌یاتم بۆچ سه‌رم ناده‌ی؟
لە دیوانەکەی چاپی کۆڕی زانیاریدا ئاوا نووسراوە:
نه‌خۆشی تۆم ده‌ناڵێنم، حه‌یاتم بۆچ به‌رم ناده‌ی؟

٤) ده‌ماده‌م ڕووح‌به‌خشی تۆ، له‌باله‌ب ساغیر و باده‌ی!
لە دیوانەکەی چاپی کۆڕی زانیاریدا ئاوا نووسراوە:
ده‌ماده‌م ڕووح‌به‌خشی، بۆ له‌باله‌ب ساغیر و باده‌ی!
بگه‌ڕێوه‌|2137 جار خوێندراوه‌ته‌وه‌|2 بۆچوون| بینێره‌| چاپ
mehdi | 9 Mar 2012 - 11:33
badbakhti lawa daya am hamaali gharadaghi gharabakhta sawadi farsishi niya chjay kurdiaka.pandeki ba diwani vafayee krduoa ba ba dawari shrri nakrdbe.har dabe bley afarim hamakarim!

کەماڵ | 9 Nov 2011 - 23:35
گەر بێتوو تازەگەرییان نەکردبێ، رەنگە پێیان وابێ ئاوایان بۆ '' چاک'' کردووە. نا لە گاڵتە دەرچێ کاک ناسر گیان، هەڵەی لەم چەشنە ئەگەر تاکە کەس بیکا، سەیر نیە، سەیر ئەوەیە بە '' کۆڕ و کۆمەڵ'' هەڵەی ئاوایان لێ ڕووبدا. ئەویش کۆڕی زانیاری کە دەستیان داوەتە تەورێک و خەریکی بڕینەوەی دارە بەبارە کۆنەکانمانن و ئەگەر وریا نەبین، لەداهاتوودا نەک هەر دارستانمان نامێنێ، بگرە قامیشەڵانیشمان نابێ

بۆچوون بنێره‌






ده‌ستپێ��|پێوه‌ند�� |copyright © 2009 sharistan.org|Design by Chia