شێعر
شێعری وه‌رگێڕدراو
ده‌نگ‌ودیمه‌ن
گفتوگۆ
وێنه‌ی ئه‌مجاره‌‌
avatar


ئاره‌شی که‌مانگیر

12 Apr 2010

کڕێوه‌یه‌ و به‌ فر ئه‌بارێ
به‌ سه‌ر دڕک وگاشه‌به‌رد دا
چیا خامۆش
سه‌ری لووتکه‌ له‌ ته‌م ده‌سوێ،
ده‌ربه‌ند دڵته‌نگ
مژی خه‌می لێ هه‌ڵده‌ستێ،
ڕێگه‌ چۆڵ و، چاوه‌ڕوانه‌
ده‌نگی زه‌نگی کاروانێکی بگاته‌ گوێ.

گه‌ر دووکه‌ڵێ له‌ سه‌ربانی ماڵێکه‌وه‌ هه‌ڵنه‌ستابا،
ورشه‌ی چرا یه‌ک -یان ئه‌گه‌ر- موژده‌ی بۆمان نه‌هێنابا،
شه‌قڵی هه‌نگاوی رێبواڕێک، له‌ سه‌ر ڕێگه‌ جێ نه‌مابا،
چیمان ئه‌کرد، چیمان کردبا
له‌نێو چنگوڕکی ته‌زیوی
کڕێوه‌ و به‌ فر و باڕندا؟

ئه‌وه‌تا وا له‌و به‌ره‌وه‌
چرای ماڵێک چاو داده‌گرێ.
ده‌کرێته‌وه‌....... ده‌کرێنه‌وه‌
درگا وئامێزی خانه‌خوێ.
بزه‌ی لێو و، تینی ئاگر
هه‌رپێکه‌وه‌ به‌ره‌وڕووم دێ.
ئه‌وا لێره،‌ له‌م ماڵه‌دا
به‌دوور له‌ لووره‌لووری با
به‌دوور له‌ هه‌نگامه‌ و هه‌رای
وه‌یشوومه‌ی سڕ وسه‌رما و سۆز،
له‌لای کوانووی گه‌رمی ئاگر
چیرۆکی خه‌وڕه‌وێن ئه‌ڵێ ئه‌مشه‌و
بۆ کۆرپه‌ خۆشه‌ویسته‌کانی خۆی، مامه‌ نه‌ورۆز:
”مناڵینه‌! ژین شیرینه!‌
شیرین، وه‌کوو هه‌نگوین وایه.‌
چی ڕه‌مز و ڕازی درکاو و نه‌درکاوه‌،
لێره‌ دایه‌.
هه‌تاوی گه‌ش
ئاسمانی شین
باخی پڕ گوڵ
ده‌شتی به‌رین
له‌نجه‌ و سه‌ما و ڕه‌وتی نه‌رمی سووره‌ماسی، له‌ نێو حه‌وزی بلووریندا
بۆنی خاکی نمه‌ی باران لێپژاوی که‌ژ و کۆسار،
له‌ ژێر تیشکی مانگه‌ شه‌ودا لایه‌لایه‌ و خه‌وی گوڵجاڕ،
هاتن، ڕابوردن، ڕاکردن،
هه‌نگی ئه‌وین هارووژاندن،
له‌ هه‌ڵپه‌ڕکێی دڵی خه‌ڵکا چۆپیگرتن،
له‌ نێو کڵپه‌ی ئازار و ئێشی ئینساندا،
سووتان، مردن
کار کردن و، کارکردن و،
حه‌سانه‌وه‌.
تا ئه‌وپه‌ڕی بیابانی زگسووتاوی له‌شهه‌ڵقرچاو، به‌ چاو دیتن.
گڕی هه‌ناوی تینووی خۆ
به‌چه‌ند قومێک ئاوی پاکی گۆزه‌ی تازه‌، دامرکاندن.
شه‌ونخوونی کێشان له‌ گه‌ڵ شه‌وله‌وه‌ڕ و شه‌وێنی مه‌ڕ،
له‌ گه‌ڵ مه‌لی که‌ژ و کێوان، ده‌نگهه‌ڵبڕین، چریکاندن
شیر به‌ گه‌رووی کارمامزی قاچ‌شکاوی له‌ڕه‌و به‌جێماودا کردن.
ئه‌رێ! ئه‌رێ! ڕۆڵه‌کانم ژین شیرینه‌!
ژین ئاگردانێکی دێرساڵی له‌مێژینه!‌
گه‌ر هه‌ڵی که‌ی
کڵپه‌ی گڕی
گه‌رمیبه‌خشی سه‌رزه‌مینه‌
هه‌ڵی نه‌که‌ی.....
هه‌ر ئه‌م کۆنه‌ئاگردانه،‌
خامۆش ئه‌بێ و،
خامۆش بوونیش تاوانێکه‌ له‌ ئه‌ستۆی ئێمه‌مانانه‌.“

مامه‌ پیره‌، نه‌رم نه‌رم، بزه‌ی ده‌خزێته‌ سه‌ر لێوان
کۆته‌ره‌یه‌ک هه‌ڵده‌گرێت و،
ده‌یهاوێته‌ سه‌ر پشکۆکان.
ئه‌مجاره‌که ‌چاوئه‌بڕێته‌ سه‌مای گڕ و،
له‌ گه‌ڵ خۆیدا دێته‌ دوان:

”تۆ دارستانی ئه‌ی ئینسان! دارستانی!
تۆ داستانی خۆڕاگری و ڕاوه‌ستانی!
ده‌شت داوێنته‌ و، چیا کۆرپه‌ی نێو باوه‌شت.
سه‌رپه‌نجه‌ی تۆ، بۆ مه‌لی سه‌ربه‌ست جێژوانه‌.
سێبه‌ری تۆیه‌ سه‌رچاوه‌ی کانییه‌کانه.‌
ئامێزی تۆ،
میوانداری خۆره‌تاو و با و بارانه.‌
تۆ ده‌سته‌چیله‌ی ئاگری!
تۆ سه‌رسه‌وز و به‌ژنبه‌رزی،
تۆ نامری!

کوانووی ژیان هه‌رگیز نابێ سارد بێته‌وه‌.“
- مامه‌ نه‌ورۆز ده‌نگ هه‌ڵدێنێ: -
”بۆ ئه‌وه‌ی گڕ دانه‌مرکێ،
دار، ده‌بێ خۆی بسووتێنێ.
رۆڵه‌کانم! گۆی بگرن بۆ به‌یتی ئاره‌ش
ئه‌و ئاره‌شه‌ی
سکڵی هیوای
له‌ نێو کوانووی خۆڵه‌مێشدا
نه‌کوژایه‌وه‌.
ئه‌و ئاره‌شه‌ی
پۆلۆی گیانی
له‌ دارستانی ئاگردا
به‌ر له‌ هه‌مووان گه‌شایه‌وه‌.

ڕۆژگارێک بوو.
ڕۆژگارێکی تفت و تاڵ بوو.
ژینمان ڕه‌ش بوو
وه‌کوو شه‌وگار، وه‌ک ڕووی نه‌یار.
ژین هه‌ر نه‌بوو، کۆی زووخاڵ بوو.
شار وگوندمان تاریک تاریک
وه‌ک سیاچاڵ،
سیاچاڵیش برینێکی چڵککردووی ژێر پۆستاڵ بوو.
برین ده‌یویست هاوار بکا و،
هاواریشی هه‌ر وڕێنه‌ و ناڵه‌ناڵ بوو.
نیوه‌نووزه‌ی کپکراوی ئینسانێکی که‌ڕولاڵ بوو.
شار، وه‌کوو به‌رد سڕ و بێده‌نگ
ڕۆژی به‌دناوی
ڕۆژگاری نه‌نگ.
سنوور و که‌وشه‌نی وڵات
وه‌ک سنووری خولیا و خه‌یاڵ،
وه‌ک سنووری خه‌ونی ئاڵۆز
ئاڵۆزابوو.

قه‌ڵای شارمان
وه‌ک قه‌ڵای دڵ
وه‌کوو وره‌ی ڕووخاوه‌کان
تێکڕووخابوو
پێخوستی پێی داگیرکه‌ر بوون
سنوور و که‌وشه‌ن و قه‌ڵا.

هیچ که‌س نه‌بوو ڕقی پیرۆز هانی بدا.
هیچ که‌س نه‌بوو دڵی بۆ عیشق ڕابچه‌نێ.
هیچ که‌س نه‌بوو ده‌ست بداته‌ ده‌ستی که‌سێک.
هیچ که‌س نه‌بوو له‌ ڕووی که‌سدا پێ بکه‌نێ.

ئاره‌زوو وه‌ک باخی تینوو
زه‌رد هه‌ڵگه‌ڕابوو، ژاکا بوو.
چاویش وه‌کوو به‌فری به‌هار
ته‌ڕیی فرمێسکی تێزابوو.
لاوی ئازا و ئازادیخواز
له‌ گشت لاوه‌ ئه‌سیری کۆت‌وزنجیر بوون،
گه‌نده‌شۆفارانی بێشه‌رم و شه‌ڕانی
حوکمدار بوون، سه‌ردار و میر و وه‌زیر بوون.

ڕدێن‌سپی و ڕاوێژکاری خێڵی دوژمن
کۆ بوونه‌وه‌ تا داوێکمان بۆ بنێنه‌وه‌
مێشک و له‌ش و سه‌ر و سنگمان
هه‌ر به‌ پێڵاوی پێی خۆمان پێشێل بکه‌ن.
کۆ بوونه‌وه‌ هه‌تا داوێک بنێنه‌وه‌
به‌ ده‌ستی خۆ گۆڕ بۆ خۆمان هه‌ڵبکه‌نین
هه‌رخۆشمان بێین
به‌ ئێسقان و خۆین وته‌رمی برای خۆمان پێ بکه‌نین.

وا چه‌ند ڕۆژه‌ ئه‌م خه‌به‌ره‌ ویردی زمانه‌
خه‌ڵک بێده‌نگ چاو ده‌گێڕێ، چاوه‌ڕوانه‌.


- دوایین فه‌رمان
دوایین بڕیار.....
تیری که‌وان تا کوێ بڕوا
هه‌تا ئه‌وێیه‌ سنوورمان.
گه‌ر ئه‌و تیره‌
که‌مێک بڕوا و باڵی بشکێ
ماڵمان ته‌نگه‌ و
ئاوات و ئاره‌زوو ده‌مرێ...
گه‌ر دوور بڕوا،
چۆن ده‌توانێ...
چه‌نده‌ بفڕێ....؟

خه‌ڵک بێده‌نگ چاو ده‌گێڕێ، چاوه‌ڕوانه‌.
هه‌موو زارێک ئه‌م خۆزگه‌یه‌ به‌ بن گوێدا ده‌چرپێنێ:
ئاخ بۆ که‌سێک
له‌ شان و باهۆی ڕابینێ
ئاخ بۆ که‌سێک
بیروباوه‌ڕ هانی بدا، بیهه‌ژێنێ.“

مامه‌ نه‌ورۆز بێده‌نگ ده‌بێ، ئه‌ژنۆی ته‌زیو ده‌جووڵێنێ.
له‌ شوێنێکی دوورده‌سته‌وه‌ ده‌نگی گورگێکی ماندوو دێ، ده‌لوورێنێ.
به‌فر ئه‌بارێ به‌ سه‌ر به‌فرا
زریان، باڵی ساردوسڕی له‌ پشتی شووشه‌ ده‌خشێنێ.

مامه‌ نه‌ورۆز هێدی هێدی دێته‌ قسه‌:
”به‌یانی بوو.
به‌رانبه‌ر به‌ سپای دوژمن
له‌ ده‌شتێکدا
له‌ شکری ئێمه‌ وه‌ستابوو
وه‌ستانی چی؟ لافاوی سه‌رباز هه‌ستابوو.

ورده‌ئه‌ڵماسی ئه‌ستێره‌ له‌ سنگی ئاسمان هه‌ڵوه‌رین،
تاریکایی له‌ نێو گه‌رووی به‌یانیدا پشووی بڕا
له‌ بناری کێوی ئه‌لبورز گوڵ به‌ شنه‌ هاتنه‌ له‌رین.
سپای ئێران
دوو دوو، سێ سێ، له‌ ده‌وری یه‌ک ئاپووره‌ی دا
مناڵ له‌ گوێسوانه‌ی بانان،
کچان له‌ ودیوی په‌نجه‌ره‌،
دایکان خه‌مناک له‌ به‌رده‌رگا.


ورده‌ ورده‌ چپه‌ وسرته‌ ده‌بێته‌ هاوار و هه‌را.
ده‌ریای ڕه‌شوڕووت ده‌شڵه‌قێ،
ده‌جمێ، ده‌کوڵێت و هه‌ڵده‌چێ،
ئه‌مجاره‌که‌ ناخی ده‌ریا ده‌پشکوێت و
له‌ سه‌ر شانی شه‌پۆل و که‌ف
به‌ ژنی پیاوێک ده‌رده‌که‌وێ وه‌کوو سه‌ده‌ف.

- منم ئاره‌ش!
روو ده‌کاته‌ خێڵی دوژمن:
- منم ئاره‌ش!
جه‌نگاوه‌ری ڕێگه‌ی ژیان
ته‌نیا خۆمم و، تاقه‌ تیرێکی نێو که‌وان،
وا ئه‌مڕۆکه‌
ڕۆژی منه‌ و
ئێوه‌ و، مه‌یدان.
مه‌پرسن کێم
من په‌روه‌رده‌ی ئێش و ئازار
من کوڕی ژان و ڕه‌نج وکار
من برووسکه‌ی شه‌قکه‌ری شه‌و
من خه‌نده‌ی سه‌ر لێوی مناڵ
من سروودی سه‌ر لێوانی خه‌ڵکی هه‌ژار!
ئه‌مجار ئاره‌ش سه‌ر هه‌ڵده‌بڕێ
ڕوو ده‌کاته‌ ئاسمانی شین:
ماڵاوا.... ئه‌ی کازیوه‌ی گه‌ش
بۆ دواجاره‌ یه‌ک ئه‌بینین.
به‌ڵێن به‌ شه‌وقی به‌ربه‌یانی ڕاستین
به‌ڵێن به‌ خۆری میهره‌بانی پڕ له‌ عیشقی ئاگرین
منی ئاره‌ش
ته‌وژم و تینی گیانی خۆم
ئه‌که‌مه‌ ناو له‌شی تیر و
گیانی زیندووی وه‌به‌ردێنم
جا ئه‌وساکه‌
له‌ هێلانه‌ی که‌وانه‌وه‌
هه‌ڵۆی تیرم هه‌ڵده‌فڕێنم.


ئه‌وا مه‌رگ
له‌ دێوجامه‌ی ترس وسامدا به‌ره‌وڕووم دێ
له‌ گه‌ڵ هه‌موو هه‌نگاوێکی
به‌ چاوی سوور لێم ده‌ڕوانێ.
ئه‌مجاره‌که‌ په‌ڕوباڵی قه‌ل و داڵی لێ ده‌ڕوێت و
له‌ سه‌ر سه‌رم ده‌خولێته‌وه‌،
چاو ده‌بڕمه‌ باڵی ڕه‌شی و،
برینی سه‌د خۆزگه‌ و خولیام ده‌کولێته‌وه‌.
بزه‌یه‌کی تاڵی دێتێ و
ده‌رگای ده‌می ده‌کاته‌وه‌
قاقای به‌رزی پێکه‌نینی
به‌ گوێی چیا و دۆڵدا ده‌دا و
چیا و دۆڵ ده‌نگ ده‌داته‌وه‌.
له‌ شان قورسه‌ باری مردن.
له‌ لام سه‌خته‌
له‌به‌رده‌می ئه‌هریمه‌نی ئینسانخۆردا چۆکدادان و سوجده‌بردن،
به‌ڵام کاتێک
که ‌شادی و خه‌م
که‌ ئاشتی و شه‌ڕ
ڕووناکی و شه‌و
فریشته‌ و دێو
به‌ره‌نگاری یه‌کتر ده‌بن
لام شیرینه‌ خۆ به‌ گه‌رووی مه‌رگا کردن.

هه‌زاران لێوی خامۆش و
نیگای نه‌رمی پڕ له‌ مانا
من به‌ په‌یکی موژده‌به‌خشی خۆ ده‌زانن
هه‌زاران ده‌ستی له‌رزۆک و دڵی به‌ کوڵ
له‌ گه‌ڵ منن
ئه‌م ده‌مگرێ ده‌ڵێ مه‌ڕۆ
ئه‌و به‌ره‌وپێش هانم ده‌دا.

ئاره‌ش ئاوڕ ده‌داته‌وه و
چاو ده‌گێڕێ به‌سه‌ر شاردا
ئارام ئارام،
مناڵ له‌ گوێسوانه‌ی‌ بانان
کچان له‌و دیوی په‌نجه‌ره‌
دایکان خه‌مناک له‌ به‌ر ده‌رگا
پیاوان سه‌ریان له‌ ڕێ ناوه،‌
به‌ بێده‌نگی
سروودی خه‌م له‌ چاویاندا قه‌تیس ماوه.

کام گۆرانی
کام مۆسیقا
کام هه‌ڵپه‌ڕکێ
مارشی کام جه‌نگ
له‌ ده‌ستی دێ دابڕێژێ
زرمه‌ی هه‌نگاوی ڕێبوارێک
که‌ ده‌ڕۆیشت به‌ره‌و نه‌بوون
زرمه‌ی هه‌نگاوی ڕێبوارێک
که‌ ده‌یزانی بۆ کوێ ده‌چێ،
بۆچی ده‌چێ،
چی به‌ سه‌ردێ،
لاڕێ کامه‌ و
کامه‌ شاڕێ؟

سپای دوژمن
هه‌ر بۆ گاڵته‌
ئاپووره‌یان ڕه‌وانده‌وه‌ و
ڕێگه‌یان بۆ ئاره‌ش چۆڵ کرد.
مناڵه‌کان له‌ سه‌ربانی ماڵانه‌وه‌ بانگیان ده‌کرد
دایکان دوعایان بۆ ده‌کرد.
پیره‌پیاوان چاویان گێڕا
کچان ملوانکه‌ و به‌رمووریان
له‌ ئه‌ستۆی خۆیان داڕنی و
له‌ گه‌ڵ ملوانکه‌ و به‌رمووری خۆشه‌ویستی و عیشق و وه‌فا
بۆیان کرده‌ توێشووی ڕێگا.

ئاره‌ش، به‌ڵام هه‌روا خامۆش
له‌ بناری کێوی ئه‌لبورز
وه‌سه‌رکه‌وت و
به‌ شوێنیدا
شار له‌ پڕمه‌ی گریانی دا.

مامه‌ نه‌ورۆز چاوی لێکنا و
به‌ بزه‌یه‌ک لیوی پشکووت
- وه‌ک خه‌ونێکی خۆشی دیبێ –
مناڵه‌کان وه‌نه‌وز ده‌ده‌ن، ماندوون به‌ڵام
په‌ڕه‌سێلکه‌ چۆن جاربه‌جار
به‌ باڵه‌فڕه‌
خۆی له‌ گۆمی نێو ئه‌شکه‌وتی کپ و تاریک هه‌ڵده‌کێشێ و
ورده‌شه‌پۆل ده‌بزوێنێ،
یادی ئاره‌ش ئا به‌و چه‌شنه‌
خۆی له‌ چاوی خه‌واڵوویان هه‌ڵده‌کێشێ و
ده‌یشڵه‌قێنێ.

ئه‌و ڕۆژه‌ تاکوو تاریکان
له ‌هه‌ر قۆڵه‌ شاره‌زایه‌ک
له ‌هه‌ر لاوه شاخه‌وانێک
له‌ دووی ئاره‌ش
به‌رد به‌ به‌رد و سه‌ری لووتکه‌ و
نێو ئه‌شکه‌وت و
بن ڕه‌وه‌ز و هه‌ڵدێره‌کان
هه‌مووی گه‌ڕان،
ئاره‌ش هه‌ر نه‌دۆزرایه‌وه‌،
شه‌ودره‌نگان که‌ هاتنه‌وه‌
که‌وانه‌که‌ و تیردانێکی به‌ بێ تیریان
بۆ خه‌ڵکی شار هێنایه‌وه‌.

به‌ڵێ! ئاره‌ش
ئه‌و پیاوه‌ بوو
که‌ تین و توانی گیانی خۆی
کرده‌ باڵی فڕینی تیر
کاری سه‌دان و سه‌د هه‌زار
تیر و تیغ و شمشێری کرد
قاره‌مانی ژیری به‌بیر.

پۆله‌ سواریک
که‌ نیوه‌ڕۆی ڕۆژی دواتر
له‌ که‌ناری چۆمی جه‌یحوون تێپه‌ڕ ده‌بوون
تیره‌که‌ی ئاره‌شیان بینی
ڕۆچووبووه‌ ناوقه‌دی دارگوێزێکی ئه‌ستوور
له‌و ڕۆژه‌وه‌ ئیتر ئه‌وێ
له‌ نێو ئێران و تووراندا
بوو به‌ سنوور.
ساڵیانی ساڵ تێپه‌ڕیوه‌ و
هه‌تا ئێستاش
مانگ و زه‌وی هه‌ر به‌ڕێوه‌ن
ساڵیانی ساڵ تێپه‌ڕیوه‌ و
هه‌تا ئێستاش
لووتکه‌کانی کیوی ئه‌لبورز هه‌ر به‌ پێوه‌ن.
هه‌تا ئێستاش
هه‌ر ڕێبوارێک
له‌ نێو ته‌م‌ومژی لووتکه‌ و
له‌ نیو به‌فری ده‌رودۆڵدا
ڕێگه‌ ون کا و
تاریکیی شه‌و ده‌وری بدا
نێوی ئاره‌ش ده‌ڵێته‌وه‌ و
په‌یتاپه‌یتا بانگی ده‌کا
فریای که‌وێ، ده‌ستی بگرێ.
ئاره‌ش جوابی ده‌داته‌وه‌
به‌ زاری به‌فر و به‌رد و دار ده‌یدوێنێ
له‌ هه‌ره‌س و
له‌ هه‌ڵدێر و
ڕێی هه‌ڵه‌ت و
له‌ هه‌وراز و نشێوی سه‌خت
ئاگاداری ده‌کاته‌وه‌
کاری خێری وه‌ڕێ دێنێ
وره‌ و هیوای پێده‌به‌خشێ
ڕێ ده‌نوێنێ.“

له‌ ده‌ره‌وه‌
له‌ودیوی دیواری ماڵی مامه‌نه‌ورۆز
کڕێوه‌یه‌ و
به‌فر ئه‌بارێ
به‌سه‌ر دڕک و گاشه‌به‌رد دا.
چیا خامۆش
سه‌ری لووتکه‌ له‌ ته‌م ده‌سوێ.
ده‌ربه‌ند دڵته‌نگ
مژی خه‌می لێ هه‌ڵده‌ستێ.
ڕێگه‌ چۆڵ و چاوه‌ڕوانه‌ ده‌نگی زه‌نگی کاروانێکی بگاته‌ گوێ.
زۆر له‌ مێژه‌ منداڵ خه‌ویان لێکه‌وتووه‌
مام نه‌ورۆزیش وه‌نه‌وز ده‌دا.
کۆته‌ره‌یه‌ک ده‌هاوێمه‌ سه‌ر پشکۆکان
گڕی ئاگر دێته‌ سه‌ما...
بگه‌ڕێوه‌|3495 جار خوێندراوه‌ته‌وه‌|9 بۆچوون| بینێره‌| چاپ
هه ژار | 14 Dec 2015 - 09:50
سلاوو ریز. تکایه چون ده توانم فایلی ده نگی که ی وه ر گرم. سپاس

سیامند گوهری بوکان | 11 Mar 2014 - 22:43
بژی کاک ناسر .....
هه مو شه ویک له دانشگا له ته وریز کاسیتی ده نگی جه نابتمان کاتیک ئه شیعره ت ده خوینه وه سه ر ده خستوو به دیاریه وه خه ومان لی ده که وت ده س خوش به راستی وه ک خویت نوسیوه ته وه بلین بریک به تام و چیژتریش سه ر که وتوو بی م

aryan | 21 Feb 2011 - 22:54
ئه م چیروکه شیعره قادری لوتفیانی و ناسری جیهانیش
وهریانگیراوه ته وه
ده قی لوتفیانی و عه لی له گوفاری مه هاباد دا چاپ کراوه و هه ر
دوو کیان به ر له سالی 1364ی هه تاوی وه رگیردراون
دیاره وا باشه هه موویان بخرینه به ر سه رنج
ئه م ئه رکه ش به کاک ناسر دهسپیرین
............
سپاس بۆ ئێوەی بەڕێز کاک ئاریان
بەداخەوە ئەو دوو دەقەم نەدیوە. ئەگەر کەسێک بتوانێ بە فایل بۆم بنێرێ زۆر مەمنوون دەبم.

kamal | 20 Jan 2011 - 19:03
به راستی خوشه.کاک ناصر

hii | 26 Dec 2010 - 19:10
har jar deyxenmewa iman denm ba adib boontan har bjin.

سه‌عدی | 23 May 2010 - 22:06
سڵاو کاک ناسری خۆشه‌ویست
له‌ سه‌روبه‌ندی ئیعدام کرانی فه‌رزادی که‌مانگه‌ر و ئه‌و چوار تێکۆشه‌ره‌ی دیکه‌ له‌ ستۆدیۆ نه‌بووی و جێگه‌ت خاڵی بوو. ئه‌مڕۆ بۆ جاری چه‌نده‌م شێعره‌که‌ی ئاره‌شی که‌مانگیر م خوێنده‌وه‌. هه‌ستم کرد فه‌رزادی که‌مانگه‌ر و ئاره‌شی که‌مانگیر زۆر له‌یه‌ک ده‌چن، نه‌ له‌به‌ر پاشناوه‌کانیان، له‌به‌ر ئه‌وه‌ی هه‌ر دووکیان بۆ ڕزگاری میلله‌ته‌که‌یان گیانیان خۆبه‌خشانه‌ و له‌ ڕووی ئاگاهییه‌وه‌ دانا. هه‌ر دووکیان ده‌یانزانی خۆیان نامێنن به‌ڵام به‌خشینی گیانیان، نه‌ته‌وه‌که‌یان به‌ره‌و ڕزگاری ده‌با و نێویان هه‌تاهه‌تایه‌ له‌ نێو سنگی مامه‌ نه‌ورۆزه‌کاندا ده‌مێنێته‌وه‌. هه‌ر بژی

هیمن | 11 May 2010 - 06:30
سلاو سوپاس بو ئه م وه رگیردراوه جوانه هه لبه ت ئه گه ر هه له م نه کردبیت ئه م شیعره ساله هایه کاک ناسر وه ریگیراوه ته وه سه ر کوردی که واته مریه م خان ده بیت بلیم ئیوه زور پاشتر وه رتان گیراوه ته وه سه ر کوردی.
تکایه له نووسینه کانتان ورد ببنه وه

مریه م قازی | 3 May 2010 - 05:46
به راستی ئەوەیە وەرگێڕاوی ئارەش. دەستەكانت خۆش بێ یاخوا. من لە سەرر ئیزنوو هەڵی دەگرم بۆ ئەنجومەنی ئەدەبی مەهاباد. پێشتر من و كاك عەلی ئیسماعیلزاده وەرمان گێڕابوو بەڵام بە دڵنییاییەوه ئەوەم زۆر بەدڵه.
...........
سڵاو و سپاس مریەم خانمی بەڕێز! زۆر خۆشحاڵ دەبم ئەگەر وەرگێڕدراوەکەی ئێوە و کاک عەلیش، لە لام هەبن. تکایە ئەگەر دەکرێ ئەو دوو دەقەم بۆ بنێرە.

aware | 24 Sep 2009 - 12:44
kak nasir her biji u bimeni. wergeraneket zor cwan bu. hezim dekird sheiri "zemestan"i exewani sales ishit kirdbaye kurdi. min hewlim da dereqeti nehatim.
zimistane
hewa zor nacwamerane sarde
werami merhebakey to le zari hich kese naye.
be spasewe

بۆچوون بنێره‌






ده‌ستپێ��|پێوه‌ند�� |copyright © 2009 sharistan.org|Design by Chia