شێعر
شێعری وه‌رگێڕدراو
ده‌نگ‌ودیمه‌ن
گفتوگۆ
وێنه‌ی ئه‌مجاره‌‌
avatar

بیروڕا

جێگه‌ی ئافه‌رین کردن نه‌بوو

12 Apr 2009

(له‌ بابه‌ت ڕاگه‌یاندنی ده‌فته‌ری سیاسیی کۆمه‌ڵه)


ماوه‌یه‌ک له‌وه‌پێش، به‌ ئیمزای کومیته‌ی ناوه‌ندیی کۆمه‌ڵه‌ ڕاگه‌یاندنێک له‌ بابه‌ت ”شاڵاوی هێرشی پڕوپاگه‌نده‌ له‌ دژی کۆمه‌ڵه‌“ بڵاو کرایه‌وه‌. له‌ هه‌ڵوێستێکدا له‌ ئاست ئه‌و ڕاگه‌یاندنه‌ نووسیم:

”نه‌ک هه‌ر هیچ ئاماژه‌یه‌ک نییه‌ که‌ ئه‌و نووسراوانه‌ (که‌ به‌ دڵسۆزییه‌کی ئاشکرا له‌ ئاست کۆمه‌ڵه‌ و بزووتنه‌وه‌ی کوردستان، نووسراون، له‌ جنێونامه‌کان) جیا بکاته‌وه‌، به‌ڵکوو ئاماژه‌ی تا ڕاده‌یه‌ک ئاشکراش هه‌ن که‌ نیشان ده‌دا، به‌داخه‌وه‌، ڕاگه‌یاندنه‌که‌ ده‌یهه‌وێ، له‌ دژی هه‌موو ئه‌و که‌سانه‌ هه‌ڵوێست وه‌ربگرێ و به‌ تایبه‌تیتریش، ڕووی له‌ ڕه‌خنه‌گرانی ناو ڕیزه‌کانی کۆمه‌ڵه‌یه‌. ئاماژه‌ی وه‌ک ئه‌وه‌ که‌ ”هه‌ڵخڕێنه‌ران و به‌ڕێوه‌به‌رانی ئه‌و شاڵاوه‌ قێزه‌ونه‌ هه‌رکه‌س بن و هه‌ر مه‌به‌ستێکیان بۆ خۆیان دانابێ، به‌ کرده‌وه‌، خزمه‌ت به‌ دوژمنانی بزووتنه‌وه‌ی ڕزگاریخوازانه‌ی گه‌لی کورد ده‌که‌ن“، تا ڕاده‌یه‌کی زۆر، مه‌به‌ستی نووسه‌رانی ڕاگه‌یاندنه‌که‌ له‌ بابه‌ت ئه‌وه‌ که‌ هه‌موو ڕه‌خنه‌گران موخاته‌بی ئه‌و ڕاگه‌یاندنه‌ن، نیشان ده‌دا.“

له‌ کۆتایی نووسراوه‌که‌مدا نووسیبووم:
”داواکارم کومیته‌ی ناوه‌ندیی کۆمه‌ڵه‌ بۆ پاراستنی سیمای کۆمه‌ڵه‌، ڕابگه‌یه‌نێ که‌ ئه‌و ڕاگه‌یاندنه، ڕووی له‌ هیچ تێکۆشه‌ر و نووسه‌رێکی دڵسۆزی ناو کۆمه‌ڵه‌ و ده‌ره‌وه‌ی کۆمه‌ڵه‌ نییه‌ و، ئه‌و تێگه‌یشتنه‌ی نووسراوه‌که‌ به‌ ده‌ستییه‌وه‌ ده‌دا، به‌ پێچه‌وانه‌ی مه‌به‌ستی نووسه‌رانی ڕاگه‌یاندنه‌که‌یه‌“.

چاوه‌ڕوان ده‌کرا کومیته‌ی ناوه‌ندیی کۆمه‌ڵه‌ ڕابگه‌یه‌نێ ئه‌و ڕاگه‌یاندنه‌ ڕووی له‌ تێکۆشه‌رانی ناو کۆمه‌ڵه‌ نییه‌. ئێستا ده‌فته‌ری سیاسیی کۆمه‌ڵه‌، له‌ ڕاگه‌یاندنێکی دیکه‌ دا، له‌و بابه‌ته‌وه‌ دواوه. ڕاگه‌یاندنه‌که‌ی ده‌فته‌ری سیاسی دوای کۆڵێک ئاسمان و ڕێسمان له‌ بابه‌ت ”ناوه‌رۆکی به‌یاننامه‌که‌ی که‌مینه‌“ و ”شێوه‌ی بڵاوکردنه‌وه‌ی به‌یاننامه‌که‌“ و، سوێندخواردن به‌وه‌ی لایه‌نگری دیالۆگ و باسی سیاسین و ئه‌وه‌ که‌ ”کێشه‌کان بنه‌مای سیاسییان نییه‌“، تاوانی بڵاوبوونه‌وه‌ی جنێونامه‌کانی خستووه‌ته‌ پاڵ که‌مینه‌. ئه‌و کاره‌‌ی ده‌فته‌ری سیاسیی کۆمه‌ڵه‌، وه‌ک ڕه‌فتارێکی دژ به‌ پره‌نسیپه‌کانی هاوڕێیه‌تی و‌، دژ به‌ حورمه‌ت و که‌سایه‌تیی تێکۆشه‌رانی ڕیزه‌کانی کۆمه‌ڵه‌ تۆمار ده‌کرێ. من له‌ نووسراوه‌که‌ی پێشوومدا ڕێگایه‌کم خستبووه‌ به‌رده‌میان تا داوای لێبوردن له‌و تێکۆشه‌رانه‌ بکه‌ن و، کارێک بکه‌ن ئه‌و هه‌ڵوێسته‌ زیانباره‌ به‌ ناوی کۆمه‌ڵه‌وه‌ ته‌واو نه‌بێ. هاوڕێیان، به‌م ڕاگه‌یاندنه‌ تازه‌یه‌ی ده‌فته‌ری سیاسی، جارێکی دیکه‌ نیشانیان دا که‌ به‌ ته‌ما نین بێنه‌ مه‌یدانی کێشه‌یه‌کی سه‌لیم و پاک، به‌ڵکوو له‌ ده‌سته‌به‌ندیی ناوخۆییدا، شێوازێکیان هه‌ڵبژارد که‌ پێشتر له‌ دژی خۆشیان به‌کارهێنراوه‌ و، هه‌رکه‌س به‌کاری هێنابێ، له‌ ئاست حه‌قیقه‌ت و ڕاستی، سه‌ره‌نجام شکاوه‌.

گریمان هه‌موو ڕه‌خنه‌کانی ده‌فته‌ری سیاسی له‌ بابه‌ت ناوه‌رۆکی به‌یاننامه‌که‌ی که‌مینه‌ دروست بێ. گریمان قسه‌کانی که‌مینه‌، -وه‌ک هاوڕێیانی ده‌فته‌ری سیاسی ده‌ڵێن- ته‌نیا گله‌یی ته‌شکیلاتین و بنه‌مای سیاسییان نییه‌. گریمان‌ شێوه‌ی بڵاوکردنه‌وه‌ی به‌یاننامه‌که‌ی که‌مینه‌ نادروست بووه‌. گریمان قسه‌ و هه‌ڵوێستی که‌مینه‌ هه‌ر له‌ بناغه‌وه‌ هه‌ڵه‌ و بێناوه‌رۆکن. به‌ڵام، ئه‌وانه‌ بۆچی تێکه‌ڵ ده‌کرێن له‌گه‌ڵ پاساوکردنی ڕاگه‌یاندنه‌که‌ی پێشووی کۆمیته‌ی ناوه‌ندی؟ ئه‌وه‌ که‌ به‌یاننامه‌که‌ی که‌مینه‌ بنه‌مای سیاسیی نییه‌ و ده‌فته‌ری سیاسی شێوازی بڵاوکردنه‌وه‌شی به‌ باش نازانێ، ئایا پاساوێکه‌ بۆ ئه‌وه‌ی که‌مینه‌ بخرێته‌ پاڵ ئه‌وانه‌ی جنێو به‌ کۆمه‌ڵه‌ ده‌ده‌ن؟

له‌ ڕاگه‌یاندنه‌که‌ی پێشووی کۆمیته‌ی ناوه‌ندیدا نووسرابوو:
”هه‌ڵخڕێنه‌ران و به‌ڕێوه‌به‌رانی ئه‌و شاڵاوه‌ قێزه‌ونه‌ هه‌رکه‌س بن و هه‌ر مه‌به‌ستێکیان بۆ خۆیان دانابێ، به‌ کرده‌وه‌، خزمه‌ت به‌ دوژمنانی بزووتنه‌وه‌ی ڕزگاریخوازانه‌ی گه‌لی کورد ده‌که‌ن“.

ئێستا هاوڕێیان له‌ ڕاگه‌یاندنه‌که‌ی ده‌فته‌ری سیاسیدا، نووسیویانه:
‌”له‌ چه‌ند مانگی ڕابوردوودا ده‌فته‌ری سیاسی و سکرتێری گشتیی کۆمه‌ڵه‌، له‌ ژێر هێرشێکی پڕوپاگه‌نده‌دا بوون و، ئه‌و نووسراوانه‌ به‌ سه‌راحه‌ت یان به‌ شێوه‌ی ته‌لویحی، به‌ لایه‌نگری له‌ هاوڕێیانی به‌ناو(1) که‌مینه‌ی کومیته‌ی ناوه‌ندی نووسراون“.

به‌مجۆره‌، ده‌فته‌ری سیاسی ڕاده‌گه‌یه‌نێ که‌ ”هاوڕێیانی به‌ناو که‌مینه“ به‌ ”هه‌ڵخڕێنه‌رانی ئه‌و شاڵاوه‌ قێزه‌ونه“ ده‌زانێ که‌ له‌ ڕاگه‌یاندنه‌که‌ی پێشووی کومیته‌ی ناوه‌ندیدا باسی کرابوو.

ده‌فته‌ری سیاسی نووسیویه‌تی:
”ئایا جێگه‌ی بیرلێکردنه‌وه‌ نییه‌ که‌ ته‌نانه‌ت یه‌ک نووسراوی ئینترنێتی نییه‌ که‌ تێیدا جنێو به‌ هاوڕێیانی که‌مینه‌ درابێ، به‌ڵام گه‌لێک نووسراوی پڕ له‌ جنێو و قسه‌ی سووک به‌ ده‌فته‌ری سیاسی و سکرتێری گشتیی کۆمه‌ڵه‌ هه‌یه‌؟“

ئه‌وه‌ هیچ ڕاستییه‌کی تێدا نییه‌ که‌ ئه‌و شه‌پۆلی جنێوه‌، به‌ لایه‌نگری له‌ که‌مینه‌ بووه‌. ئه‌وه،‌ تۆمه‌تهه‌ڵبه‌ستنه‌ بۆ که‌مینه، به‌ نیازی شکاندن و سووک‌کردنی‌. ئه‌و نووسراوانه‌ی جنێویان تێدا بووه‌، له‌ دوور و نزیکه‌وه‌، په‌یوه‌ندیان به‌ که‌مینه‌ و باسه‌کانیه‌وه‌ نه‌بووه‌. ته‌نانه‌ت یه‌ک وشه‌ش جنێو به‌ لایه‌نگری له‌ که‌مینه‌، به‌ ده‌فته‌ری سیاسی و سکرتێری گشتیی کۆمه‌ڵه‌ نه‌دراوه‌.

کێ ئه‌و شه‌پۆله‌ی هه‌ڵخڕاند؟
به‌ڵام چۆنییه‌تیی که‌ڵکوه‌رگرتن له‌و هێرشی جنێودانه‌، به‌ڵێ جێگای بیرلێکردنه‌وه‌یه‌ و زۆریش جێگای بیرلێکردنه‌وه‌یه‌. که‌ڵکوه‌رگرتنی ده‌فته‌ری سیاسی له‌و شه‌پۆلی جنێودانه‌، له‌ دژی هاوڕێیانی که‌مینه‌ و به‌ قازانجی خۆی، زۆر زیاتر ئه‌و شه‌پۆلی هێرشه‌ ده‌کاته‌ جێگه‌ی بیرلێکردنه‌وه‌. ئه‌و فه‌زایه‌، ته‌نیا یه‌ک لایه‌ن که‌ڵکی لێوه‌رگرتووه‌ و ئه‌ویش ده‌فته‌ری سیاسیی کۆمه‌ڵه‌یه‌ که‌ ویستی و هه‌وڵیدا ڕه‌خنه‌ و هه‌ڵوێستی که‌مینه‌ به‌رێته‌ ناو شه‌پۆلێک له‌ جنێو و شاڵاوی هێرشی پڕوپاگه‌نده‌ بۆ سه‌ر ده‌فته‌ری سیاسی و سکرتێری گشتیی کۆمه‌ڵه‌. من ده‌فته‌ری سیاسیی کۆمه‌ڵه‌ به‌وه‌ تاوانبار ده‌که‌م که‌ به‌ قواستنه‌وه‌ی ئه‌و شه‌پۆلی جنێودانه‌‌‌، هه‌وڵیدا فه‌زای باسه‌ناوخۆییه‌کان ژاراوی بکا. نیشاندانی ده‌فته‌ری سیاسی وه‌ک مه‌زهه‌ری کۆمه‌ڵه‌ که‌ هێرشی کراوه‌ته‌ سه‌ر و، نیشاندانی که‌مینه‌ وه‌ک هاوده‌نگی ئه‌و هێرشه‌، کارکردی ڕاگه‌یاندنه‌کانی کومیته‌ی ناوه‌ندی و ده‌فته‌ری سیاسییه‌.

ده‌فته‌ری سیاسی له‌ ڕاگه‌یاندنه‌که‌یدا نووسیویه‌تی:
”که‌سانێک، ئه‌غڵه‌ب به‌ ناوی نهێنییه‌وه‌، په‌یدا ده‌بن که‌ نه‌ک هه‌ر جنێو به‌ کۆمه‌ڵه‌، به‌ڵکوو جنێو به‌ زه‌مین و زه‌مان ده‌ده‌ن“.

به‌ڵێ ئه‌وه‌ ڕاسته‌! له‌سه‌ر ئینترنێت نووسراوی وا که‌م نین که‌ تێیاندا جنێو به‌ حیزبه‌کان و که‌سایه‌تییه‌کان و ڕێکخراوه‌کان و ڕێبازه‌ سیاسییه‌کان و گرووپه‌ دینی و ڕه‌گه‌زی و قه‌ومییه‌کان ده‌درێ. وه‌ک ده‌فته‌ری سیاسی ده‌ڵێ له‌سه‌ر ئینترنێت جنێو به‌ زه‌مین و زه‌مان ده‌درێ. به‌ڵام ئایا جێگه‌ی بیرلێکردنه‌وه‌ نییه‌ که‌، له‌ نێو هه‌موو حیزبه‌کان و زه‌مین و زه‌ماندا که‌ له‌سه‌ر ئینترنێت قسه‌یان پێده‌گوترێ، بۆچی هیچ حیزبێک و ده‌فته‌ری سیاسی و کۆمیته‌ی ناوه‌ندیی هیچ حیزبێک، بێجگه‌ له‌ کومیته‌ی ناوه‌ندی و ده‌فته‌ری سیاسیی کۆمه‌ڵه‌، کۆشی بۆ ئه‌و جنێوانه‌ ناگرێته‌‌وه‌ و بایه‌خی ئه‌وه‌یان پێنادا ته‌نانه‌ت لایان لێ بکاته‌‌وه‌؟ ماوه‌یه‌که‌ له‌هه‌ر کوێره‌سایتێکی ئینترنێت به‌ردێک فڕێ بدرێ، ده‌فته‌ری سیاسیی کۆمه‌ڵه‌، به‌ په‌له‌ به‌ره‌وپیری ده‌چێ و شانی وه‌به‌رده‌دا. که‌ی ئه‌وه‌ ڕه‌وایه‌ ده‌فته‌ری سیاسی، له‌ نێو ئه‌و هه‌موو ئه‌رکه‌دا که‌ کۆمه‌ڵه‌ ده‌توانێ و ده‌بێ به‌ڕێوه‌یان به‌رێ، چه‌ند مانگه‌ کۆمه‌ڵه‌ی سه‌رقاڵی شه‌ڕ له‌ دژی چه‌ند ئیمزای ئینترنێتی کردووه‌؟ که‌ی ئه‌وه‌ کاری حیزبێکی سیاسی و ده‌زگای رێبه‌ڕایه‌تییه‌که‌یه‌تی؟ چه‌ند مانگه‌ ئه‌و ڕێبه‌رایه‌تییه‌، ”فریا ناکه‌وێ“ کۆبوونه‌وه‌یه‌ک بگرێ و تێیدا له‌ سه‌ر ئاوه‌دانکردنه‌وه‌ی ده‌زگایه‌کی ڕاگه‌یاندنی وه‌ک ڕۆژهه‌ڵات تی‌ڤی(2) بڕیارێک بدا، زیاتر له‌ ساڵێکه‌ ئه‌ندامانی ده‌فته‌ری سیاسیی کۆمه‌ڵه‌ تاقه‌ یه‌ک وتاریان بۆ ئه‌و تلڤزیۆنه‌ نه‌نووسیوه‌ که‌ ده‌توانێ میلیۆنها بینه‌ری هه‌بێ، ساڵ و نیوێکه‌ ئاماده‌ نه‌بوون تاقه‌ لاپه‌ڕه‌یه‌ک له‌ بابه‌ت ڕێبازی کارکردن و ڕێساکانی ڕێکخستنی تلڤزیۆنه‌که‌ بنووسن، به‌ ته‌مای چی هێزی کۆمه‌ڵه‌یان سه‌رقاڵی شه‌ڕه‌ ته‌نز و ته‌وسی ئینترنێتی کردووه‌؟

ئه‌و ئیدیعایه‌ی هاوڕێیانی ده‌فته‌ری سیاسیش که‌ که‌مینه‌ به‌رانبه‌ر به‌ شه‌پۆلی هێرشی پڕوپاگه‌نده‌ بۆسه‌ر ده‌فته‌ری سیاسی بێده‌نگ بووه‌، ڕاست نییه‌. کاک عومه‌ری ئیلخانیزاده‌ له‌ دوو گفتوگۆدا، له‌و بابه‌ته‌وه‌ قسه‌ی کردووه‌ و به‌رانبه‌ر به‌و که‌سانه‌ هه‌ڵوێستێکی ئاشکرای نواندووه‌. هه‌رکام له‌ ئێمه‌، له‌م ساڵانه‌دا گه‌لێک جار، ڕه‌نگه‌ زیاتر له‌ زۆر هاوڕێی دیکه‌، له‌سه‌ر حورمه‌ت و که‌سایه‌تیی تێکۆشه‌رانی کۆمه‌ڵه‌ و ڕێبه‌رانی وه‌ده‌نگ هاتووین و بێگومان له‌ داهاتووشدا وا ده‌بین.

‌ده‌فته‌ری سیاسی ڕه‌خنه‌ی له‌وه‌یه‌ که‌ که‌سانێک به‌ ناوی نهێنییه‌وه‌ هێرش ده‌که‌نه‌ سه‌ری، به‌ڵام ئه‌و ڕاستییه‌ ده‌شارێته‌وه‌ که‌ که‌سانێک نه‌ک به‌ ناوی نهێنییه‌وه‌، به‌ڵکوو به‌ ناوی ناسراوی خۆیانه‌وه‌، له‌سه‌ر کورسیی ده‌فته‌ری سیاسی و سکرتێری گشتیی کۆمه‌ڵه‌وه‌، توندترین هێرشیان کرده‌ سه‌ر ئه‌م‌وئه‌و، ڕاست به‌ نیازی که‌ڵک وه‌رگرتن له‌و فه‌زایه‌ که‌‌ کاردانه‌وه‌ی به‌رانبه‌ره‌که ده‌یخوڵقێنێ‌. مه‌سئوولییه‌تی نه‌ک هه‌ر تۆمه‌ت هه‌ڵبه‌ستن بۆ که‌مینه‌ی کومیته‌ی ناوه‌ندی، به‌ڵکوو هه‌روه‌ها مه‌سئوولییه‌تی سازکردنی ئه‌و فه‌زایه‌ و دواتر قواستنه‌وه‌ی جنێوه‌کانیش، ڕاسته‌وخۆ له‌ ئه‌ستۆی هاوڕێیانی ده‌فته‌ری سیاسیی کۆمه‌ڵه‌یه‌.

ده‌فته‌ری سیاسی ده‌ڵێ:
”ته‌نانه‌ت یه‌ک نووسراو نییه‌ که‌ تێیدا جنێو به‌ هاوڕێیانی به‌ ناو که‌مینه‌ درابێ“ و هه‌روه‌ها ده‌نووسێ: ”ئه‌گه‌ر له‌ سه‌ر ئینترنێت هیچ سووکایه‌تی و ئیهانه‌یه‌ک به‌ هاوڕێیانی به‌ ناو که‌مینه‌ نه‌کراوه‌، ده‌بێ ده‌فته‌ری سیاسی ئافه‌رین بکرێ“.

مه‌به‌ست له‌ سازکردنی ئه‌و فه‌زایه‌، هه‌ر ئه‌وه‌ بوو که‌ ئه‌و ئه‌نجامه‌ی لێ وه‌ربگیرێ. ده‌فته‌ری سیاسی هه‌وڵی بۆ ئه‌وه‌ داوه‌ سیمای که‌مینه‌ وا به‌رچاو بخا. له‌ چه‌ند مانگی ڕابوردوودا، چه‌ندین جار، له‌ نامه‌ی ژماره‌یه‌ک له‌ ئه‌ندامانی کۆمه‌ڵه‌دا، سووکایه‌تیی له‌م چه‌شنه‌ به‌ هاوڕێیانی که‌مینه‌ و ڕه‌خنه‌گرانی دیکه‌ کراوه‌. له‌ نووسراو و قسه‌ی ناو کۆبوونه‌وه‌ی ئه‌نداماندا، به‌ حوزووری سکرتێری گشتی و ئه‌ندامانی دیکه‌ی ده‌فته‌ری سیاسی به‌ عومه‌ری ئێلخانیزاده‌ گوترا ”له‌ گه‌ڵ که‌سانی گومانلێکراو هه‌ستان و دانیشتنی هه‌یه‌“. هه‌روه‌ها له‌ نامه‌یه‌کی ناخۆییدا، نووسه‌ری ئه‌م دێرانه‌ به ‌”په‌یوه‌ندی له‌ گه‌ڵ که‌سانی گومانلێکراو“ تۆمه‌تبار کرا. ده‌فته‌ری سیاسی ئاماده‌ نه‌بوو له‌و تۆمه‌تبارکردنانه‌ بپرسێته‌وه‌. ئێمه‌ زووتریش وتمان، ئه‌و تۆمه‌تبارکردنه‌، ڕاسته‌وخۆ به‌ پشتیوانیی ده‌فته‌ری سیاسی به‌ڕێوه‌ ده‌چێ. ئێستا ده‌فته‌ری سیاسی که‌ له‌ ڕاگه‌یاندنه‌که‌ی خۆیدا شه‌پۆلی پڕوپاگه‌نده‌ له‌ دژی کۆمه‌ڵه‌ ده‌داته‌ پاڵ که‌مینه‌‌‌ و، جگه‌له‌وه‌ش ژماره‌یه‌ک له‌ تێکۆشه‌رانی کۆمه‌ڵه‌ و نزیک له‌ کۆمه‌ڵه‌ش، به‌ خزمه‌تکردنی دوژمنانی بزووتنه‌وه‌ی ڕزگاریخوازی کوردستان تۆمه‌تبار ده‌کا، درێژه‌ی هه‌مان سیناریۆی تۆمه‌تهه‌ڵبه‌ستنه‌‌ که‌ چه‌ندمانگه‌ له‌ ناوخۆی حیزبه‌که‌دا له‌ دژی ڕه‌خنه‌گران به‌ڕێوه‌ی ده‌به‌ن. ده‌فته‌ری سیاسی چاوه‌ڕوانه‌ ئه‌و ڕه‌فتاره‌ی ئافه‌رین بکرێ؟

ڕه‌فتاری ده‌فته‌ری سیاسی، که‌ ئه‌م شێوازه‌ زیانباره‌‌ له‌ کێشه‌ی ناوخۆییدا به‌کار دێنێ و ئاوا هه‌وڵی سووک‌کردنی تێکۆشه‌رانی له‌مێژینه‌ی بزووتنه‌وه‌ی کوردستان و ڕیزه‌کانی خۆی ده‌دا، که‌ ناونیتکه‌ی خزمه‌تکاری دوژمنانی بزووتنه‌وه‌ی ڕزگاریخوازی کوردستان له‌ تێکۆشه‌رانی له‌مێژینه‌ ده‌نێ، که‌ شه‌پۆلی جنێودان به‌ کۆمه‌ڵه‌ ئاوا به‌کار دێنێ، جێگه‌ی ئافه‌رین کردن نییه‌‌، جێگه‌ی به‌خۆدا چوونه‌وه‌یه‌.

هه‌ڵوێستی ده‌فته‌ری سیاسیی کۆمه‌ڵه‌ نیشانی دا، کۆمه‌ڵه‌ ئه‌گه‌ر له‌ هیچ بوارێکی دیکه‌شدا پێویستیی به‌ چاکسازی نه‌بێ، له‌ بواری پره‌نسیپه‌کانی کێشه‌ و ململانێی ناوخۆییدا و، له‌ چۆنییه‌تیی به‌کارهێنانی ئامیری ده‌سه‌ڵاتدا پێویستیی به‌ چاکسازی هه‌یه‌.



په‌راوێز
(1) هاوڕێیانی ده‌فته‌ری سیاسی، ته‌نانه‌ت ئه‌وه‌یان پێ ڕه‌وا نه‌دیوین به‌ خۆمان بڵێین که‌مینه‌. له‌ ڕاگه‌یاندنه‌که‌یاندا که‌ باسی ئێمه‌ ده‌که‌ن، به‌ هاوڕێیانی ”موسوم به‌ اقلیت“ ئاماژه‌مان پێده‌که‌ن. ئه‌وه‌ وا ده‌گه‌یه‌نێ که‌ ده‌فته‌ری سیاسی، که‌مینه‌ به‌ ڕه‌سمییه‌ت ناناسێ و، جێگه‌ی حیزبیی بۆ دانانێ. به‌ تایبه‌ت ئه‌وه‌ش‌ جێگای سه‌رنجه‌ که‌ ده‌ڵێن ”چاوه‌ڕوانیی کۆمه‌ڵه‌ له‌و هاوڕێیانه‌ ئه‌وه‌یه‌ که‌...“، یانی له‌ هه‌ڵوێستی هه‌موو کۆمه‌ڵه‌وه‌ له‌ گه‌ڵ ئێمه‌ ده‌دوێن و، دان به‌وه‌دا نانێن که‌ ئێمه‌ش وه‌ک به‌شێک له‌ کۆمه‌ڵه‌ بسه‌لمێنن.
ناو نه‌هێنانی لایه‌نێک به‌و ناوه‌ی خۆی له‌ خۆێ ده‌نێ، سوننه‌تێکه‌ له‌ حیزبایه‌تیدا که‌ له‌گه‌ڵی ئاشناین و، نیشانه‌ی قه‌بووڵ نه‌کردنی فره‌چه‌شنی، نه‌بوونی تۆلێرانس و، خۆ به‌ هه‌موو شتێک دانانه‌.

(2) له‌ ڕاگه‌یاندنه‌که‌ی هاوڕێیانی ده‌فته‌ری سیاسیدا، وتراوه‌ ”که‌مینه له‌ به‌یاننامه‌که‌یدا باسی ڕۆژهه‌ڵات تی‌ڤی نه‌کردووه‌“.
وا نیشان ده‌درێ کارنامه‌ی ڕۆژهه‌ڵات تی‌ڤی، خاڵی لاوازی ئێمه‌یه‌ بۆیه‌ باسی ناکه‌ین. ئه‌وه‌ ڕاست نییه‌. هه‌موو هه‌نگاوێکی ڕۆژهه‌ڵات‌تی‌ڤی، به‌ تێپه‌ڕکردنی ئه‌و کۆسپانه‌ بووه‌ که‌ ژماره‌یه‌ک له‌ هاوڕێیانی ده‌فته‌ری سیاسی بۆیان خوڵقاند. من، ئه‌گه‌ر له‌و بابه‌ته‌وه‌ تا ئێستا بێده‌نگ بووم و لێوی خۆم کورۆشتووه‌، ته‌نیا بۆ ریعایه‌تی حورمه‌تی ده‌فته‌ری سیاسی بووه‌ که‌ له‌ پله‌ی ڕیبه‌رایه‌تیی کۆمه‌ڵه‌دایه‌.
بگه‌ڕێوه‌|1845 جار خوێندراوه‌ته‌وه‌|0 بۆچوون| بینێره‌| چاپ

بۆچوون بنێره‌